جـــــــــــــــــــــــــــرـرـرررح

جرح بيه يون ما هود وطاب
واعرفه اشگد كلف عند اليداوون
انعگد وياي من لحظات الـ اجياب
لجن ما بان بالدلال مدفون
رافگني العمر عن عيني ما غاب
تربى اوياي ترهم غيبته اشلون
گلت مضموم ما شايفته الاغراب
واگولن ما ظهر بس لليعرفون
اظنن هيج لاجن ظني ما صاب
واشوف الناس كلها ابجرحي يحجون
حلم جان وطلعلي الحلم جذاب
الجرح داين تبين وانه مديون
جرح كاتب ابهمه اعتاب واعتاب
يكابر بالصبر بس صبره شيكون
غميج ابسره حارت كل الالباب
يدورون اليشبهه وما يلاگون
جرح يگطر عذاب وگطره خنياب
اذا هد ابنزيفه ايفيّض الكون
جرح بس يا جرح ما حوطه اكتاب
ولا موصوف بحروف اليكتبون
جرح بس يا جرح شو صار محراب
الفلك واشما حوه اضحوا بيه يصلون
جرح بالروح ما شلته امن الحساب
احسب بلكي يشفه وشدته اتهون
يشب النار بيه وهو حطّاب
ايحطب گطرات دمي وماي العيون
جرح ضلع البتول الكسّره الباب
اذن معذور جرحي ان جان مجنون