لجل عين الوطن

لجل عين الوطن وعيون هاي الناس


...

گتلك صفي گلبك حتى نتشارك
اجيتك شايل ابچفي غصن زيتون ...
ليش انته مصر وياي تتعارك
عوف الطائفيه ومنهج المحتل ...
كافي اتبيع اخوك وتهدم اديارك
مو انته الچنت مضرب مثل بالجود ...
حاتم بالضيافه وشايعه اخبارك
حولته مضيفك غرفه للتعذيب ..
وصفه جمر الدلال اغموس خطارك
چان اليعتنيك اتگصله احلى اثياب ...
هس اليعتنيك ايزرفه منشارك
قلعت اعيون اخوك والله لو ناخيه ...
چا بيده شلعهه وجابهه الدارك
شجاك اتغيرت مابين ليله اويوم ...
عساهه ابخت كلمن سمم افكارك
اريد آنه اسألك جاوبني بلله ارجوك ...
جارك ليش يمك نزل واختارك
لان عنك سأل گالوله طيب ذات ...
اشلون اطاك گلبك شيلت جارك
من حمل غراضه اعيونك انته اتشوف ...
وتباوع ازغاره اتودع ازغارك
دمع مرته وبناته الغرّگ الوجنات ...
يظل طول الحياة ايذكرك ابعارك
حسبالك تأمن من شعلت النار ...
هم ترجع عليك وتاكلك نارك
باچر تنكره والمنك يعاديك ...
واول ما ايبيس بيك مگوارك