دمعـــــــــــه او وطـــــــــــــــــن
يا موطن حضاره او ماضي الأمجاد
أشتظن ماضيك قسراً يرجع النه
بعيونك .. كبـرنه أزغار وكبار
وشـاب الراس لمـّن ما كبرنه
سجلنه ابمحبتك كل السنيــن
وحطينه اعله عمرك من عمرنه
بحضانك يتامى او ناكل الجوع
او من ثديـّك حزن صافي رضعنه
يالكلك نبع .. والجود عطشـان
كـَطرة ماي من فيضك طلبنــه
وكَفت اعله النهر جن انته عباس
شــرب من العطش لمـّن ذكرنه
غركـَانه ابمصابك كل العيون
اوتشـكَ ازياجها الدمعه ابجفنه
الفرات اعلى الجروف ايسنّد الماي
ودجله اتنوح بــس تخنــكَ الـوّنه
بساتين البجرفك ذبّلن ليش ؟؟
ونامت للظهر غبشــة فلحـنه
ليلك ما ينام اشعجب هلــ نام
ومحتار ويه نجمه ايضل كـَمرنه
ثلث نجمات ضوّن ظلمة سماك
فوكَ الكَاع طاحن من سكتـنه
نكـَطعلك نجم من شجرة الليل
ونزرعهن قـُبل وسطك علمنـه
صح نارك توّجر بين الضلوع
بس برد وسلام وجنها جنـّه
يالحضنك بلم وذراعك الهور
يالصبحك نفس من ضي شمسنه
تفرج ياعراق وضيمك ايذوب
مثل ما ذاب بعيادك شمعــنه
وترجع بسمتك مرسومه بشفاك
ونغنيلك وطـــــنه او يا وطــــنه
موضوع: دمعــــــــــ .. أو .. وطن .. ــــــــــــه 
الأربعاء سبتمبر 24, 2008 1:08 am
