جيمي قهر بغداد
صار الدمع دم
بعد الصبر ما إنقضى
وما خلص ذاك الهم
بلكي يجينا الصبح
بلكي الشمل يلتم
الموت يمشي هناك
يحصد بكل الناس
والدم على الحيطان
وشاب الشعر بالراس
كل يوم تنذبحين
وماكو أبد إحساس
بغداد طال البعد
وشوكت نتلاكى ؟ ( نتلاقى )
وهناك كلبي سكن ( قلبي )
وعراقنا .. عراكه ( عراقه )
بغداد رجعي الوكت
شكد طول فراكه (فراقه)
خيم عليج المر
وكل الشعب ذاكه
بغداد بسج قهر
بسج شكد تبجين
مشينا مشية حزن
وعيب إحنا متغربين
بغداد جرحج كبر
وهمومج مطولين
أحجيلي سالفتج
أرتاح من تحجين
بغداد قهرج قهر
وتسولف النخلات
والي احبهم مشوا
وحدي مع النجمات
ما أدري ياهو العدل
ما أدري ياهو المات
والعمر يركض ركض
ما يرجع الي فات
والصبح لازم يجي
ويمحي الظلم فينا
خلينا نضحك سوى
وننسى الجرى بينا
ويطلع علينا القمر
وتحلى ليالينا
وترمين ثوب القهر
ويعود ماضينا
وكلنا نغني سوى
ويه أهالينا
حلوة بهلج بغداد
بغداد .. حينا بغداد .. حينا
موضوع: حزن بغداد شعر شعبي عراقي 
الخميس سبتمبر 25, 2008 1:07 pm